1Cor 2 | KMG | STEP | Âgo bureŋ, no ŋoŋerao fisipo ine Anuture mumutaniŋ dâŋ ŋazapemurâ dâŋ ericke bâpiaŋ ehuc me maŋɋârâŋ dâŋ moc muhuc mi ŋazapo.

1 Corinthians 2

Paulozi mu bâpiaŋ dâŋ mi muwec

1 Âgo bureŋ, no ŋoŋerao fisipo ine Anuture mumutaniŋ dâŋ ŋazapemurâ dâŋ ericke bâpiaŋ ehuc me maŋɋârâŋ dâŋ moc muhuc mi ŋazapo. 2 No šiŋuc mana sanaŋkehuc fâpo: Dâŋ gâcne aricne, Jesu Kristo maripoŋko qakicne ere dâŋ jâmbâŋ jaha muzepac. 3 Erâ ŋoŋerao dodocne enarehame hâhâwic â memezac faio boc jupo. 4 Ehuc miti mumu i maŋɋârâŋ dâŋ mu bâpiaŋ ekicne irec sâcko mi mupo, aricne, tâpiri â Mâro ŋoŋerao fuaocte irec sâcko mupo. 5 I mamanasiŋ-ŋeŋiczi ŋic maŋɋârâŋ dâŋko mâcne, Anuture tâpirio fosiŋneocte iŋuc epo.

Anuture dâŋsoŋ mufuakicne

6 Maŋɋârâŋ dâŋ hukicne ine maŋjeŋic ɋârâŋkekicne jaŋe jazaeŋgopeneŋ, erâ i mâreŋ kecširec maŋɋârâŋ dâŋ me mâreŋ ŋicbomboŋ sisirowenezi dâŋ hukicne mueŋgopieŋ irec sâc mi eekac, aricne. 7 Nâŋe Anuture dâŋsoŋ hukicne mufuaeŋgopeneŋ. Dâŋ i ŋic nâŋâc taniŋke ɋaɋac enaŋte Anutuzi mârâc jaha dameŋmâc juwecko mu bâmoc ewec. 8 Mâreŋ ŋicbomboŋ jaŋeraonec moczi moc dâŋ hukicne i hâcne mi mana tarambiŋ, mana tararâ muzac eri tatamac Wofuŋ maripoŋko mi qanšapiŋ. 9 Irec dâŋqâreŋ fokac ine šiŋuc:

“Ʒâŋezi mi honekicne â hazeczi mi manakicne,
â ŋicmaŋ moczi moc mi manasukicne,
Anutuzi maŋjauŋ ecneeŋgopieŋ
jaŋere biŋe bâmockewec i hâcne.”

Ŋic Mâroheczi miti manapie fârinehec eekac

10 Nâŋe ine Anutuzi Mâro-ticne ecneme dâŋ i mufua-nârewec. Mâro e wiac sasawa irec fuŋne mana gufuc efâreekac. Anutu e jahacne fuŋne bâutuckekicne i mâmâc manaekac. 11 Mo ŋiczi âgo-ticnere maŋte fuŋne manaocmu? Maŋ rune eki sawa manaocmu. Eme Anutu maŋticnere fuŋne iŋuc jaha ŋic moczi mi manaocmu, Anutu Mâro-ticnezi buc manaocmu. 12 Eme nâŋe ŋickonec mâro i mi rombeŋ, nâŋe Anuturaonec miti kâdoc hone mana tarac enaŋte Anuturaonec Mâro i rombeŋ. 13 Nâŋe miti kâdoc irec hâcne mu binaŋ eeŋgopeneŋ. I ŋic maŋɋârâŋheczi mi qazu-nârembiŋ, i Mârozi qazu-nârewec. Eme Mârore dâŋ i Mârore dâŋmaracko mueŋgopeneŋ. 14 Ŋic Mâro tâmiric moczi ine Anutu Mâro-ticnere dâŋ mi manaocmu. E wemo-ticnezi manaocmu, aricne, e maname dâŋ fârimâc eocmu. I Mâroheczi mamanane sawa eekac. 15 Ŋic Mâroheczi wiac sasawa sâcne mana wosâeocmu, ŋic Mâro tâmiriczi ine ere fuŋne kâuc baocmu. 16 Wofuŋ maŋticnere dâŋ i mozi manaweczi sâcne âzâcne mutâc eocmu? Nâŋe ine Kristo maŋbuc-ticnere dâŋ bajuŋgopeneŋ.